John 11

Liyazaru La Fi

1Oza ɓei nyi ai yi wo ge Liyazaru nyasan san wo. Wo ɓei dna n Baitanya nu ɓedo nwo amapui yi, Maryamu n Marita yi. 2Maryamu ye nwo mapui ɓei shi n nyasan yi nyi, owo nu ɓo ze omi sin-dayi ya kpe n Yesu apita, wa wun kwo ya nwo tukwo yi-i. 3Ntu cenu, Liyazaru mapui ɓa tnu tnu-tnu ga Yesu ge, “Dagayi gye nyasan oho ʼza ye-ye-yi lo.”

4Shi Yesu ɓo wo lonu, wa gna ge, “Ai Liyazaru nyasan to zhin efi nya num, ama ntu Shekwoyi latu ɓo nu; njesun Shekwoyi Nugun ɓa bwa latu.”

5Yesu ɓo zhin woi ye a Marita n, Maryamu yi ɓedo n Liyazaru yi. 6Esa Yesu ɓo wo Liyazaru nyasan ɓo ncei, wa dna nnaba nwo ɓo dnanyi anyipyei ngun aba kpa to wa lo Baitanya m. 7Avun wa gna wo abara ge, “Yi lo Yahudiya kni.”

8Ama owo abara to ɓo ce pma ɓa lo m. Ɓa gna wo ge, “Dagayi nbwasun n yahoi nu to, nɓa ɓo ye ɓa kni ho akuta n Yahudiya kni n, Hoi ye ha je lo ɓo?”

9Yesu wa ci ɓa ge, “Awa to nyi awo-cei-aba nu nyipyei buzangna nyan? Zan-zan yi ta ce bwonyi m, ntuge wo gye wyeba lo sarai. 10Ama n Sukwoyi oza zhin wa cbwonyi ntuge wyegma dna lo.” 11Wa gna ɓa ge, “Eyi nugundo Liyazaru la wangye, ama mi ɓa lo mi kun wo agyewyi ya.”

12Owo abara ɓa ci ge, “ngye wo wan egye nu ai wo ɓa kun agyewyi.” 13Yesu ɓo da efi nu ɓo, owo abara ɓai gye ngye egye gam nu.

14Ntu ce Yesu wa gna ɓa pei-pei ge, “Liyazaru lafi.” 15A da mi lo ntu fye ɓo, shi mi to ɓo gni nwo afi bam, deye ɓa ga fye sa fya ga mi gaiciya.

16Toma, nna ɓei zhin ai je wo yi ge aza-aba nyi, wa gna wo abara aje ge, “Yi lo yo fi nknusun nwoi.”

17Shi ɓa ɓo si Baitanya, a gna ɓa ge, Liyazaru ku anyipyei bwa ngun-anyi dna nvingwo. 18Baitanya ɓei bwasun ngye mil ngun-aba nu n Urushelima yi. 19A Yahudiyi nmwa begye ɓa ɓe ɓa gye Marita n Maryamu yi ntu oɓa mapui fi ɓo. 20Esa nu Marita ɓo wo ge Yesu ɓe lo n zokwo, wa lo shegun Wo, ama Maryamu wa ce dna napi.

21Marita wa ci Yesu ge, “Ho ɓei gna ho gni, omi mapui to ɓei ɓa fi m. 22Ama mi kpe lo ge kwo nsaiye Shekwoyi ɓa ga ho nyaho-nyahoi nha gyi wo wye.”

23Yesu wa gna wo ge, Oho mapui ɓa laka njesun.

24Marita wa dna wo ɓegbe wa ci ge, “E mi kpe lo ge wo ɓo laka n nyippyei kmaknayi. 25Yesu wa gna wo ge, Mi zhin maku aza fi ka, ma je a wye-wyeyi ga, oza nwa ga mi gaiciya kwo woi fi, wo ɓa je wye-wyeyi bwa; 26Oza nwo n wye-wyeyi, wa ga mi gaiciya wo ta shan fim. Ho la gaiciya ga deye?”

27Marita wa ci ge, Dagayi mi la gaiciya ga ge, Ho nu zhin Kristi Shekwoyi Nugun nwo ɓe anyi ye lo nyi.

28Marita wa lo da Maryamu nnapi, wa yi wo gni fya-a, wa gna wo ge, “Dagayi la ɓe, woi nya ho ɓo lo.” 29Nsayi-sayi, Maryamu wa lo da Wo.

Yesu La Liyazaru Lakala

30Yesu to ɓei lo dna n zhinmin, ama wo ɓei ye gni nnaba nu Marita ɓo shegun wo nyi. 31Shi abwiwanyi ɓo gye Maryamu woi gmiya lo nnawyei ya, ɓa gye ge wo lo wo cibwi nu n Liyazaru vingwo. Ntu cenu ɓa vi wo lo.

32Shi Maryamu ɓo si Yesu aba, wa ya shi n Yesu apita ʼba, wa gna wo ge, “Dagayi ho ɓo gna ge ho gni omi mapui to ɓei ɓa fim.”

33Esa wo ɓo gye Maryamu ɓedo na Yahudiyi ɓai ci bwi, bugba wun wohin n kalayi. 34Wa nya ɓa ge, “Fye woi ɓi shi nna?” Ɓa gna wo ge, “Dagayi ɓe ha gye.” 35Yesu wa ci bwi.

36A Yahudiyi ɓa ci ge, “Ai owo nugundo nu sosai, ɓo kwo la sun woi ci bwi nyi.”

37Azaho ɓa ci ge, “Ashe oza nwo ɓo kpe wyebuayi awye ya, to ɓo ɓa mi wa zhin ozaye to wa fim?” 38Yesu nsun-sungye yi mwa, wa lo vingwo aba. Vingwohi ɓo zhin kuta-bmi nu, nkuta dnagmayi gu nkwo egbe.

39Yesu wa gna ɓa ge, “Fye kpe kuta ya!” Ama Marita wa ci ge, “Dagayi aɓa gye wo la casin, ntuge nyipyei nyihi nu nyi shi wo ɓo fi.”

40Yesu wa gna wo ge, “Mi to ku gna ho ge ndei ha ga gaiciya ho ɓa gye Shekwoyi mwa-mwa wye m?”

41Aza ɓa kpe kuta ya. Yesu wa kpe awye wu ʼshe wa zhin aduwa, “Dada ma gode shi ho wo mi aduwa. 42Mikpe lo ge ho zhin ha wo mi cici, ama mi da deye lonu, ntu aza ɓo nu nɓa zhi ya nyi, ntuge ɓa ga gaiciya ge oho na tnu mi. 43She wo ɓo ku da lonu, wa yi nbegye kalayi ge, ‘Liyazuru gmiɓe.’ ”

44Nsayi-sayi, Liyazuru wa gmi ɓe, n papyi, dna na zafi aje, Yesu wa gna ɓa ge “fye lo wo ya, fya ga wo zokwo wa duya.”

45A Yahudiyi nmwa begye, nɓa ɓo ɓe Maryamu gye, ɓa gye oɓo n Yesu ɓo zhin, ɓa ku gaiciya ga wo. 46Ama azadoho ɓa kuka ɓa lo ɓa gna Afarisiyi ɓo Yesu ɓo zhin.

47Ntucenu, amalami dnagmayi nna Farisiyi ɓa yezhi ntuge ɓa dna aɓo wye. Ɓa nya aje ge, “Yi ɓa zhin wuna? Ntuge Ozadeye zhin aɓo wo-woyi lo. 48N ya fawo wa gyi abye, aza ɓa ku zo wo vi. A Romayi ɓo ɓe ɓa la yi aduwa nyakun ya, ɓo wu yi vinya.”

49Ama ozadoho nɓa mi ai yi wo ge, Kayafa, Malami Dnagmayi nu, wa gna ge “Fye zhin atukwo gbolo danu, fye ta kpe ɓo ye lom.” 50Gwoma zaknayi wo fi, cei ya cici ge begye kwo bwi. Tile zaknayi ye wa fi ntu yi ɓo. 51Oɓo n Kayafa ɓo da ge Yesu ɓa fi ntu aza vinya ɓo nyi, Wo ɓo da kwo ntuge wo nu ɓo zhin Malami dnagmayi, ama Shekwoyi nu ɓo wu wo kwo, wo to ɓo da kwo n wohin nubo zhin num. 52Shekwoyi ɓo ku lu da ge Yesu ta-a fi, ntu a Israilayi ɓo nu gmanyim, ama ntu nna aza vinya ɓo. 53Tunyi nwyihiyi a Yahudiyi atukwoda ɓa ya wo zan shin ntuge ɓa wu wo.

54Yesu to ɓo je zan dna n Yahudiya knin Wo ɓei la Urushelima fa wa lo wa dna n zhi ɓiyi ho Ifraimu nya ɓedo nwo abara yi. 55Paskasa kwa wu vi, begye kwa ɓe Urushelima sapa to wyihi kwoi sim, ntuge ɓa ze ɓahin gyi-gyi-yi, paska wyi kwa kpesi. 56A Yahudiyi atukwoda ɓa ya Yesu zan shin, esa ɓa ɓo fi n aduwa nyakun, ɓa nya aje ɓo ge, “Fye gye lo ngye wo ɓa ɓe paska ye.” 57A Malami dnagmayi ɓedo a Farisi yi ɓei la egbe lu ga ge zahozahoi nwa gye Yesu wa da npye, ntuge ɓa wan Wo.